ދުނިޔޭގެ ކުރިއެރުން މިހާރު ބިނާވެފައި މިވަނީ ޓެކްނޮލޮޖީގެ އަސްދާރުގެ މައްޗަށެވެ. ކޮންމެ ދުވަހަކުވެސް އައު އީޖާދުތަކާއި، އައު ޚިދުމަތްތައް ދުނިޔެއަށް ތައާރަފުވަމުންދާއިރު، މި ބަދަލުތަކާ އެއްގޮތަށް އިންސާނުންގެ ދިރިއުޅުމުގެ ވައްޓަފާޅިވެސް ދަނީ ބަދަލުވަމުންނެވެ. މިފަދަ ހަލުވި ޒަމާނެއްގައި، ކުރިއަރަމުން އަންނަ ޓެކްނޮލޮޖީއާ ރަހުމަތްތެރިވެ، އޭގެ ބޭނުން ހިފަން ދަސްކުރުމަކީ ކޮންމެ ފަރުދަކަށް ވެސް ލާޒިމު ކަމެކެވެ. މިކަމަކީ ހަމައެކަނި ފަސޭހައަކަށް ވުރެ ބޮޑަށް، ޒަމާނާ އެއްވަރަށް ދެމިހުރުމަށްޓަކައި ކޮންމެހެން ބޭނުންވާ އަސާސީ ހުނަރެކެވެ.
ޓެކްނޮލޮޖީގެ ސަބަބުން ދިރިއުޅުމުގެ ކަންކަން ވަނީ އިންތިހާއަށް ފަސޭހަވެފައެވެ. ގިނަ ވަގުތު ހޭދަކޮށްގެން ކުރިން ކޮށްއުޅުނު ކަންކަން މިހާރު ކުޑަ ވަގުތުކޮޅެއްގެ ތެރޭގައި ކުރެވެއެވެ. މިސާލަކަށް ބޭންކިންގ ޚިދުމަތްތައް، ސަރުކާރުގެ އިދާރީ ކަންކަން، އަދި ލޮޖިސްޓިކްސްގެ ދާއިރާ (އެއްތަނުން އަނެއްތަނަށް މުދާ އުފުލުން) ޑިޖިޓަލްވުން ހިމެނެއެވެ. މީގެ އިތުރުން، ތައުލީމީ ދާއިރާގައި އޮންލައިން ކްލާސްތަކާއި، ސިއްހީ ދާއިރާގައި ޓެލެމެޑިސިންގެ ޚިދުމަތްތަކަކީ، ދިރިއުޅުމުގެ ފެންވަރު ރަނގަޅުކޮށްދީ، ވަގުތާއި ފައިސާ ސަލާމަތްކޮށްދޭ މުހިންމު ވަސީލަތްތަކެކެވެ. ޓެކްނޮލޮޖީން ލިބޭ އެންމެ ބޮޑު އެއް ފައިދާއަކީ ވަގުތު ސަލާމަތްވުމެވެ..
ޓެކްނޮލޮޖީ އާއި ރަހުމަތްތެރި ވުމުގެ ސަބަބުން ވަރަށް ގިނަ ކަންކަމުގައި ލުއިފަސޭތަތައް ލިބިގެންދެއެވެ. އަދި ދުނިޔެއަށް އަންނަ ބަދަލުތަކާ އެކު ކުރިއަށް ދިއުމުގެ ފުރުޞަތު ފަހިވެގެންދެއެވެ. ޑިޖިޓަލް ހުނަރުތަކަކީ ޒަމާނީ ވަޒީފާގެ ބާޒާރުގައި މުހިންމު ޝަރުޠެކެވެ. ޓެކްނޮލޮޖީ ދަސްކޮށްގެން ތިބޭ މީހުންނަށް އައު ވަޒީފާގެ ފުރުޞަތުތައް ހޯދުމާއި، މިހާރު ކުރަމުންދާ މަސައްކަތްތައް އިތުރަށް ހަރުދަނާކުރުމުގެ ގާބިލުކަން ލިބެއެވެ. އަދި އަމިއްލަ ކަންކަން އަމިއްލައަށް ނިންމުމުގެ މިނިވަންކަން ލިބި، އެހެން މީހުންނަށް ބަރޯސާވާ މިންވަރު ކުޑަވެންދެއެވެ.
ޓެކްނޮލޮޖީއާ ބީރައްޓެހި، ލޯހުޅުވެން ޖެހޭ މިންވަރަށް ނުހުޅުވޭ މީހުންނަށް ދިމާވާ ގޮންޖެހުންތައް ވަރަށް ގިނައެވެ. އެފަދަ މީހުންނަށް އޮންލައިން ޚިދުމަތްތަކުން އެކަހެރިވެ، މުހިންމު މައުލޫމާތުތައް ހޯދާބެލުމުގެ ފުރުސަތު ގެއްލިގެންދެއެވެ. މުޖުތަމައުން އެކަހެރިވެގެން ދިއުމުގެ ބިރު އޮވެއެވެ. މިސާލަކަށް، އޮންލައިންކޮށް ފޯމު ފުރުމަށް ނުވަތަ ބިލެއް ދެއްކުމަށް ނޭނގުމުގެ ސަބަބުން، އަބަދުވެސް އެހެން މީހުންގެ އެހީތެރިކަމަށް އެދެން މަޖުބޫރުވެއެވެ. މިކަމުގެ ސަބަބުން ވަގުތު ބޭކާރުވުމުގެ އިތުރުން، އެމީހެއްގެ އަމިއްލަ ކަންކަމުގައި އެހެން މީހުންނަށް ބަރޯސާވާން ޖެހުމުގެ ނާޒުކުކަން އެމީހުންނަށް އިހުސާސް ކުރެވެއެވެ. ޓެކްނޮލޮޖީއާއި ބީރައްޓެހި ވުމަކީ ޢިލްމީ ގޮތުންނާއި، އިޖްތިމާޢީ ގޮތުން ކުރިއަރަމުންދާ ދުނިޔެއެއްގައި އިންސާނާ ފަހަތައް ޖައްސާ، ގަމާރުކަމުގެ ސިފަ ލިބިގެންދާ ކަމެއްކަމަށް ވެސް ބެލިދާނެއެވެ.
ކޮންމެ މީހަކުވެސް ޓެކްނޮލޮޖީ ދަސްކުރަން ޖެހޭނީ އެމީހެއްގެ ދިރިއުޅުމާއި މަސައްކަތަށް އެކަށީގެންވާ މިންވަރަށެވެ. ހުރިހާ އެންމެން ޓެކްނޮލޮޖީގެ މާހިރުންނަށް ވާކަށް ނުޖެހެއެވެ. ނަމަވެސް، އީމެއިލް ބޭނުންކުރުން، އޮންލައިންކޮށް މައުލޫމާތު ހޯދުން، އަދި ޑިޖިޓަލް ސަލާމަތީ ކަންކަން ދަސްކުރުން ފަދަ އަސާސީ ޑިޖިޓަލް ހުނަރުތަކަކީ ކޮންމެ މީހަކު ވެސް ދަސްކުރަން ޖެހޭ މުހިންމު ކަންކަމެވެ. އުމުރުން ދޮށީ މީހުންނާއި، ޓެކްނޮލޮޖީގެ ދާއިރާއާ ދުރު މީހުންނަށް ޚާއްސަކޮށްގެން ތަމްރީނުތައް ދިނުމާއި، އަމިއްލައަށް ދަސްކުރުމުގެ ރޫޙު އާލާކުރުވުމަކީ މުޖުތަމަޢުގެ ކުރިއެރުމަށްޓަކައި ކޮންމެހެން ކުރަންޖެހޭ ކަމެކެވެ.
ކުރިއަރަމުން އަންނަ ޓެކްނޮލޮޖީއާއި ރަހުމަތްތެރިވުމަކީ ޒަމާނީ ދިރިއުޅުމަކަށް ލާޒިމުކަމެކެވެ. ޓެކްނޮލޮޖީގެ ސަބަބުން ލިބޭ ފަސޭހަތަކާއި، ކުރިއެރުންތަކުގެ ބޭނުން ހިފައިގެން ނޫނީ، ޒަމާނާ އެއްވަރަށް ކުރިއަށް ދިއުމަކީ ދަތިކަމެކެވެ. އެހެންކަމުން، ކޮންމެ ފަރުދަކުވެސް އަމިއްލަ ދިރިއުޅުމުގެ ބޭނުންތަކަށް އެކަށީގެންވާ މިންވަރަށް ޓެކްނޮލޮޖީ ދަސްކޮށް، އެއަށް އަންނަ ބަދަލުތަކާ އެއްގޮތަށް އަމިއްލަ ނަފްސު ތައްޔާރުކުރުމަކީ، އަމިއްލަ ކުރިއެރުމާއި، މުޖުތަމައުގެ ތަރައްޤީއަށްޓަކައިވެސް މުހިންމު ކަމެކެވެ. ޓެކްނޮލޮޖީއަކީ މާނައެއް ނެތް އެއްޗެއް ކަމަށް ނުދެކޭށެވެ. އެއީ ފުރުޞަތުތަކުގެ ދޮރާއްޓެވެ.
